Династия семьи Уляшевых (Тима Педöр рöдлöн велöдысь династия)
Семён Васильевич Уляшёв (26.08.1902- 11.04.1981 гг.) — церковнöй старосталöн пи.
Семён чужлӧма Тима Педӧрын. Школа бӧрын велӧдчӧма Помӧсдінса Высшӧй начальнӧй училищеын, кодӧс помалӧма 1920 воын 17 арӧсӧн. 1920 вося сентябрь тӧлысьӧ мӧдас уджавны велӧдысьӧн (сылы буретш тырас 18 арӧс) Вӧльдінса начальнӧй школаын.
1924 воын босьтасны армияӧ служитны, воас бӧр 1926 воын. Армияысь локтӧм бӧрын гӧтрасяс Вӧльдінса ныв вылӧ, и сійӧ жӧ воас ыстасны велӧдны Скӧрӧдумса школаӧ, кӧні уджалас 1929 воӧдз. Сэсся Пузлаын уджалас 1930 восянь 1934 воӧдз.
1934 воын став семьянас, мӧснас и овмӧснас лэччас «Бородино» нима пароходӧн Мысӧ велӧдны Курьядорса начальнӧй школаын.
Мыс бӧрын Семён Васильевичӧс ыстасны Бадьёль йывса школаӧ заведующӧйӧн, кӧні сійӧ уджалас 1939 восянь 1942 воӧдз.
1942 вося май тӧлысьӧ Семёнӧс босьтасны война вылӧ, воюйтас Карельскӧй фронт вылын, воӧдчас сержантӧдз, сэсся сьӧкыда ранитчас веськыд киас.
1944 вося август тӧлысьын демобилизуйтасны. Локтас гортас и арнас нин бара заводитас велӧдны, индасны Кузьмылькса школаӧ, кӧні уджалас 1944 восянь 1962 воӧдз.
42 во сетас велӧдӧм уджлы Уляшёв Семён Васильевич, бура уджалӧмсьыс сылы сетасны «За трудовую доблесть» медаль, а бура воюйтӧмсьыс сетлӧмаӧсь «За оборону Ленинграда» да «За победу над Германией» медальяс.
Александра Васильевна Уляшёва
Александра Васильевна Уляшёва, Семён Васильевичлӧн ичӧтджык чой, – велӧдлӧма ичӧт классъяс. Помавлӧма война водзвылын дженьыд учительскӧй курсъяс. Медводз учителялӧма Югыдтыдорын, сэсся Дёма нима грездын, Канаваын, Дзолльын.
Верӧс сайӧ петӧм бӧрын верӧсыскӧд овлӧмаӧсь Ягкӧджын. Сэсся гозъя локтӧмаӧсь овны Тима Педӧрӧ.
Ия Семёновна Игнатова
Семён Васильевичлӧн ныв, ичӧт классъяс велӧдысь.
Чужлӧма Тима Педӧрын 1940 воын, январ 28 лунӧ. 10 класс помалӧм бӧрся ӧти во уджалӧма Помӧсдінса леспромхозын машинисткаӧн.
Во мысти мунӧма велӧдчыны Сыктывкарса педучилищеӧ. Велӧдчӧм помалӧм бӧрся Ия Семёновна локтӧма ас районӧ, кык во уджалӧма Ярашъюын, петӧма верӧс сайӧ. Верӧсыс нуас Ияӧс Воркутаӧ, кӧні Ия Семёновна велӧдас куим во.
Игнатовъяс сэсся локтасны Помӧсдінӧ. Велӧдысьлы удж сюрас и тан. Первой Выльгортын, а сэсся Помӧсдін школаын.
Сюрис Ия Семёновналы 46 вонад и ичӧт классъясын тӧдӧмлунъяс сетны, и роч кыв нуӧдны ыджыдджык классъясын нин, и продлёнкаын уджавны уна во.
Бура уджалӧмысь Ия Семёновналы сетісны «Отличник народного просвещения» ним да уна Почёт грамота.
Мария Семёновна Литвин
Семён Васильевичлӧн ичӧтджык ныв.
Мария Семёновна чужӧма 1945 воын. Школа помалӧм бӧрын велӧдчӧма педучилищеын, лоӧма батьыс да чойыс моз жӧ ичӧт класса челядьӧс велӧдысьӧн.
Педучилище помалӧм бӧрын ыстӧмаӧсь велӧдны Мысӧ.
Во-мӧд мысти Мария Семёновна вуджӧма мӧд велӧданінӧ – Діасёръяӧ, петӧма верӧс сайӧ и верӧсыскӧд мунӧма Украинаӧ.
Надежда Дмитриевна Артеева
Ыджыдджык нылыс Ия Семёновналӧн, внучкаыс Уляшёв Семён Васильевичлӧн.
Сыктывкарса педучилище помалӧм бӧрын 40 во уджаліс Ухта карса садикын, кöнi чужтіс коми кыв дiнö муслун ичöт арлыда челядьлысь, аслас «Краеведение» кружок вылын тöдмöдіс найöс важ коми оласног йылысь.
Вера Дмитриевна Голева
Ия Семёновналöн ичöтджык нылыс, Уляшёв Семён Васильевичлӧн внучкаыс.
Сыктывкарса технологическöй колледжын велöдчöм бöрын лоис велöдысьöн жö. 38 во нин велöдö Воронеж карса колледжын том нывкаясöс вурны мода серти кöлуй.
Владимир Игоревич Шомысов
Шомысов Владимир Игоревичлӧн, Семён Васильевич внуклӧн, велöдан стажыс 46 во.
Сыктывкарса институт помалӧм бӧрын кык во уджалiс Мысын. Коми кыв да литература, роч кыв да литература предметъяс кындзи, нуöдлöма тшöтш рисование, черчение, труд, физкультура, история, этика и психология семейной жизни да биология.
Пожöг шöр школаын уна во велӧдіс НВП да коми кыв да литература урокъяс, бӧръя вояссӧ велöдіс ОБЖ.
Георгий Михайлович Уляшёв
Георгий Михайлович Уляшёв (1937–2021) – Уляшёв Семён Васильевичлöн племянник, Ия Михайловна Чигриновалӧн вок, нималана велӧдысь.
1963 восянь 1989 воӧдз Георгий Михайлович уджаліс Помӧсдінса шӧр школаын, велӧдіс технология предмет.
Ия Михайловна Чигринова
Ия Михайловна Чигринова чужлöма 1938 воын – Уляшёв Семён Васильевичлöн племянница, вокыслöн ныв, начальнöй классъяс велöдысь.
Ия Михайловна 30 сайӧ во велöдöма ичöт зонпосниöс Дiасёръя посёлокын.
Уна вося бур уджысь Ия Михайловналы сетӧмаӧсь «Отличник народного просвещения» ним.
Марина Анатольевна Чигринова
Марина Анатольевна Чигринова – ныв Ия Михайловналӧн, биология, география да химия предметъяс велӧдысь. 1993 восянь 2003 воӧдз велӧдӧма водзын Діасёръяын, сэсся Сысольскӧй районын.
Таисия Сергеевна Полухина
Таисия Сергеевна Полухина – ныв Марина Анатольевналӧн да внучка Ия Михайловналӧн, тренер да физкультураысь велӧдысь, олӧ юркарын.
Водз колис мамтӧг, быдтісны да велӧдісны ыджыд мамыс да ыджыд батьыс. Помаліс Сыктывкарса университет.
Руслан Викторович Чигринов
Руслан Викторович Чигринов, Ия Михайловналӧн внук – тшöтш бöрйöма велöдысьлысь профессия да сетö тöдöмлунъяс математикаысь да информатикаысь Дiасёръяса школаын.
Светлана Викторовна Чигринова
Светлана Викторовна Чигринова – Ия Михайловналӧн внучка.
Помаліс ОБЖ факультет Сыктывкарса КГПИ-ын, ӧні уджалӧ Архангельскӧй областьса Котлас карын школа- интернатын.