Династия педагогической семьи Шомысовых
Василий Андреевич да Марфида Афанасьевна Шомысовъяс
Тайö фото вылас Василий Андреевич да Марфида Афанасьевна Шомысовъяс.
Василий Андреевич – историяысь велöдысь, велöдлöма Керчомъя сиктын, вöлöма и школаса директорöн.
Марфида Афанасьевна велöдлöма сэн жö ичöт классъяс.
Василий Андреевич Шомысов (13.03.1914–13.12.1941)
Шомысов Василий Андреевич – пи Шомысов Андрей Петровичлöн, коді Гражданскöй война дырйи писаралöма Семён Будённый дінын.
Пожöгын велöдчöма начальнöй школаын, а шöр школа помалöма Кулöмдінын. Велöдчöм бöрас пырöма Ленинградса педагогическöй институтö.
Кор воссьöма Сыктывкарын пединститут, вуджöдчöма татчö да вöлöма история факультетлöн медводдза выпуск лыдас.
Армияö босьтасны 1940 воын, лоас политрукöн, первойя лунъяссянь веськалас Ыджыд войналöн чорыд тышö. 1941 вося декабр толысьын кык посни челядя гöтырыслы воас курыд юöр – Василий Андреевичлöн Украинаса степъясын лы ни ку вошöм йылысь.
Альбина Васильевна Канева (Шомысова)
Альбина Васильевна Канева (Шомысова) – Василий Андреевичлöн да Марфида Афанасьевналöн ныв.
Бать-мамыс моз лоис велöдысьöн. Карö мунтöдз велöдіс ичöт классъясса челядьöс Кулöмдін районса сиктъясын.
Пенсия вылö петтöдзыс нуöдiс музыка да технология урокъяс Сыктывкарса школаын.
Игорь Андреевич Шомысов
Шомысов Игорь Андреевич – ичöтджык вок Шомысов Василий Андреевичлöн.
Уна во велöдiс Пожöг шöр школаын, сетiс тöдöмлунъяс зонкаяслы труд урокъяс вылын да нуöдiс военнöй делö.
Владимир Игоревич Шомысов
Шомысов Владимир Игоревич – Игорь Андреевичлöн пи да Василий Андреевичлöн племянник.
Нималана коми велöдысь, гижысь, журналист.
Дыр кад чöж велöдiс коми кыв да литература, НВП да ОБЖ Пожöг да Мыс школаясын.
Ёна тöждлысьлiс чужан кыв, культура, традицияяс видзöм вöсна. Век вöлi нюмсера, шань да вежавидзысь мортöн.
Бур уджысь Владимир Игоревичлы сетісны морöсвывса пас «Почётный работник общего образования Российской Федерации».
Муза Андреевна Тимушева (Шомысова)
Муза Андреевна Тимушева (Шомысова) – Шомысов Василий Андреевичлöн да Игорь Андреевичлöн чой.
Война кадö школа помалöм бöрын уджалöма Вомынбöжса детдомын воспитательöн.
Война помасьöм бöрын помалöма педучилище, дыр уджалöма Тимшер школаса библиотекаын.
Муза Андреевна детдомса воспитательяскöд война кадö |
Муза Андреевна детдомса воспитательяс да челядькöд (пукалö шуйгавывсянь медводдзаыс) |
Муза Андреевна детдомса челядькöд да воспитательяскöд. Дасьтысьöны концерт кежлö (шуйгавывсянь медводдзаыс) |
Нина Андреевна Попова (Шомысова)
Нина Андреевна Попова (Шомысова) – Василий Андреевич Шомысовлöн медся ичöт чойыс, математика велöдысь.
Александр Афанансьевич Попов, верöсыс Нина Андреевналöн – роч кыв да литература велöдысь.
Кыкнанныс Кулöмдін районын зэв нималана йöз, уна во велöдiсны Тимшерын. Александр Афанасьевич вöлi тшöтш школаса директорöн.
Нина Андреевна Тимшер школаса 1973 вося выпускникъяскöд да велöдысьяскöд (Пукалö медводдзаöн веськыдвывсянь) |
Елена Александровна Смолина (Попова)
Елена Александровна Смолина (Попова) – Нина Андреевна да Александр Афанасьевич Поповъяслöн ныв, Шомысов Василий Андреевичлöн племянница.
Сыктывкарса КГПИ помалöм бöрын лоис велöдысьöн. Уна во велöдіс медся ичöтъяссö юркарса школаын. Бур уджысь Елена Александровналы 2023 воын сетісны «За верность профессии» морöсвывса пас.
Сылöн верöсыс – Смолин Павел Гелиевич – велöдысь жö, помавліс Коми пединститут, уна во сетіс тöдöмлунъяс технологияысь юркарса велöдчанiнъясын.